Ceritane awan kuwe bar kuliah Kemplu agi nggombali pacare si Markonah nang ngisor wit ringin alun-alun."Kowe tambah mengeneh lah tambah ayu baen lho?" Kemplu agi muji-muji Markonah.
"Ya mestine, wong nyong ya mesti tambah ayu terus," Markonah gole semaur lenjeh banget.
"Mesti gara-gara dadi pacarku ya kowe dadi semringah terus," Kemplu ngomong karo njawil lengene Markonah.
"Sing ana tuli mas Kemplu sing kaya wong agi ketiban duit sekarung, bisa pacaran karo nyong wong paling ayu se kecamatan," Markonah semaur.
"Kiyeh nyong arep ngomong, siki dewek angger ngundang aja jeneng ya, tapi kaya wong-wong kaelah ben keton tambah romantis," Kemplu usul marang pacare.
"Contone kaya ngapa?" Markonah takon.
"Semisal kaya kiye, angger nyong ngundang Markonah Shinta mengko Markonah ngundang mas Kemplu Rama, kepriwe, apik mbok," Kemplu usul.
"Lah nek kaya kuwe kuno banget lah liyane jajal, sih lewih modern lah," Markonah ora setuju karo usule Kemplu .
"Apa kaya artis baen, Markonah ngundang inyong Pipi, mengko inyong ngundang Markonah mimi," Kemplu aweh usul liyane.
"Lah isin lah mbok ndarani tiru-tiru Anang karo Krisdayanti," Markonah emoh maning.
Mbarang ngusulna pirang-pirang pilihan tapi Markonah ora setuju sidane Kemplu dadi kesuh."Lah terus apa? apa kaya kiye baen, Markonah ngundang Mas Kemplu AA, kayane apik ya?" Kemplu usul.
"Lah terus Mas Kemplu ngundang Markonah apa?" Markonah takon.
"Berarti ya ngundange EE," Kemplu ngomong kambi mlayu wedi disrampang sandal nang Markonah. (*)
